21 Maret: Tuhan, domma huuji manolong diringku

“Dong ma sada puang-puang, na dob sapuluh dua tahun marnunut-nunut pantang ni hiouni, seng dong na boi pamalumkon. Roh ma ia mandohori hun pudi ni Tuhan Jesus, ijamah ma rambu ni hiouni. Jadi mintor pantan ma daroh ai”. (Lukas 8: 43,44)

Terjemahan baru (LAI 1973), “Jadi adong ma sada naboru, na dob sapuluh dua tahun sai marnunut roh pantang ni hiouni, anjaha seng dong na boi pamalumhonsi.
8:44 Roh ma ia hun pudini, anjaha ijamah ma rambu ni hiouni, gabe mintor soh ma daroh ai”.

Parinangon on domma sapuluh dua tahun boritan, domma bois duit partambar. Ibahen panambari ai pe bois ni pambotohni, tapi lalab do seng ra malum, ai ma ase laho ia bani Tuhan Jesus.

Porsaya tumang do ia bani Tuhan Jesus, boi do ipamalum naboritni ai asal pajumpah ia pakon Tuhan Jesus. Age rambu ni hiouni gelah ijamah, malum do ia.

Sonai ma tenger ni uhurni bani Tuhan Jesus. Roh ma ia nanget-nanget hun pudi ni Tuhan Jesus, ijamah ma tongon rambu ni hiouni, jadi mintor pantan ma daroh ai. Domma piga-piga tahun ia boritan badan pakon tonduyni janah laho matei mando porini lang podas dapot partolongan. Humbani na dob in domma iuji sagala dalan, marhitei parugamaon pe, aha pe lang mangasi, tong do ia manaron.

Ibogei pasal Jesus. Tapi sonaha ma bahenonni roh bani Jesus. Seng ope ongga iparsahapkon, seng ope ongga ia mangindo partolongan bani Jesus.

Anggo dong hasosakanmu, ulang pala manlambungi be ham mangindo partolongan, mintor roh ma ham Bani Jesus, ulang pala madokahtu ase roh ham bani Tuhanta. Hataonkonmu ma: Tuhan, domma huuji manolong diringku, tapi seng lanjar mardamei, seng lanjar sonang uhurhu. Sonari Tuhan roh ahu Bamu, na dob manaron na marsik janah matei Ham halani hanami. Bere Ham ma damei bangku ase gabe anak ni Naibata ahu.

 

Ham Tuhan Jesus! Bamu do dong partolongan, bere Ham ma pasupasumu bangku, ase roh ahu hu Bamu manjalo haluahon. Amen.

Haleluya No. 128: 1- 3 O Jesus na Pagoluh au

1. O Jesus na Pagoluh au, Anak ni Naibata.
Holong atei-Mu togu au, ondos bai Naibata.
2. Tongon sonang do uhurhin mardingat layak-Mu;
Ai Ham do hagoluhankin bani parmatei-Mu.
3. Anggo domma manosal au halani dousakin,
iipuk daroh-Mu do au anggo hudingat in.

 

Advertisements