3 Maret : Mase seng ididah uhurta holong ni atei ni Naibata banta?

tnt_mar3_manandaholongninaibata

 

Jadi dilo-dilo ma na mapitung ai nini : O Jesus Anak ni si Daud, maidop ma uhurmu bangku. Nini Jesus ma dompaksi: aha ipindo do uhurmu bahenonku bam ? Jadi ihatahon ma: marpangidah ma namin matangku Tuhan! Jadi ihatahon Jesus ma: marpangidah ma ho! (Lukas 18: 38-42)

Ibahen na marpangidah do hita ase boi ibasa hita hata ni Naibata. Tapi dong do deba hita seng marpangidah mata ni uhurni. Seng ididah uhurni holong ni atei ni Naibata banta. Tarima kasih ma halani dihut hita gabe anak ni Naibata. Age pe sonai porlu ope lambin torang hita (uhurta) marpangidah, ulang halimanmanni hansa.

Aha ma sibahenonta? Usihi hita ma na mapitung ai, mardilo-dilo ma hita bani Jesus. Anggo isungkun Tuhanta hita atap aha sibahenonni banta. Balosta pe dear ma songon balos ni na mapitung ai: “Bahen Ham ase torang hudidah na holong atei ni Naibata bangku. Bahen Ham ma ase huahap na dob anak ni Naibata ahu”.

Anggo ipindo hita sonai, ibere do pasu-pasuni bani uhurta, gabe ididah (iahap) hita ma banggal ni holong ni atei ni Naibata banta. Anggo ibalosi (iidangi) hita Naibata, lambin torang do banta Bapanta do Naibata janah hita anak hinaholonganni. Na pansing na susi do Bapanta ai, pardousa do hita. Lambin dohor hita bani Naibata lambin iahap hita do buei pakon banggal ni dousanta. Lambin talar ma banta idop ni uhur ni Naibata.

 

Ham Tuhan Jesus! Maidop ma uhurmu mangidah hamami. Ajari Ham ma hanami mangidah banggal ni dousanami pakon banggal ni idop ni uhurmu. Amen.

Haleluya No. 129 : 1, 5. Ai Jumpah Au na Holong Atei >>
1. Ai jumpah au na holong atei, au na tarbuang in hinan.
Jesus Tuhan parholong atei hubangku na kahou hinan.
Nuan hutanda Tuhankin, parholong atei banggal in,
parholong atei banggal in.
5. Ai pe, ale Tuhan Jahowa, ulang be buat holong-Mu.
Boan ma au, alo Naibata, dob matei au hu lambung-Mu.
Sai malas uhurhin ijin, mamuji holong atei in,
mamuji holong atei in.