6 Maret: Itonggohon Jesus ase ulang miloh haporsayaonta

 

tnt_mar6_itonggohondohita

 

“Tapi domma Hutonggohon ho, ulang miloh haporsayaonmu. Jaha dob mulak use uhurmu, pargogohi ma uhur ni hasomanmu”. (Lukas 22:32)

(Terjemahan baru, “Tapi Ahu do manonggohon ho, ulang miloh haporsayaonmu, anjaha dob mulak use uhurmu, pargogohi ma uhur ni saninamu”.)

Itonggohon Tuhan Jesus do susianni ase ulang ikahua na jahat sidea, itonggohon ase ulang maseda haporsayaonni, ase ulang miloh haporsayaonni. Paima roh parlajoan domma dobdob itonggohon Tuhan Jesus susianni, ulang talu bani parlajoan, tapi ase totap haporsayaon ni sidea.

Ai lang ai ma sada na patut hamegahonkonta sanggah roh parlajoan banta? Ai lang ai ma mambere gogoh banta mangimbang parlajoan? Jesus Kristus simada kuasa i nagoriatas pakon i nagoritongah on do mantonggohon hita, ulang miloh haporsayaonta.

Ra do mahol hata ai siat hubagas uhurta, ra iahap hita lape patut itonggohon Tuhan Jesus ahu pardousa janah sigalek haporsayaon on. Tapi porsaya ma ham itonggohon do hita ulang miloh haporsayaonta. Ipargogohi do hita ibagas sagala parlajoan. Botoh ham ma itonggohon Tuhan Jesus do sagala na marosuh gabe anak ni Naibata.

Ingat ham ma itonggohon do susianni, itonggohon do Apostel Petrus, na mamorsousi use. Iparayak do si Tomas na sangsi pasal parpuhoonni gabe porsaya bani Tuhan Jesus pakon Naibata.

Ulang ipingkir ham sahalak ham do na manaron parlajoan, sahalak ham do mangimbang na jahat. Tenger ma uhurmu bani sagala na borat ibagas uhurmu ijin do Tuhan Jesus margogohi ham. Seng itadingkon ham ibagas pusok ni uhurmu.

 

Ham Tuhan Jesus, domma ididah hanami holong ni uhur-Mu bani susianmu ijia, sonai do homa holong ni atei-Mu bani susianmu sonari, ai ma sagala na tardidi hubagas goran-Mu. Itonggohon Ham do hanami. Tarima kasih ma Bamu Tuhan. Amen.

Haleluya No. 133: 1-3. Holong do Atei >>
1. Holong do atei ni Naibatangku
parholong atei mangidah au.
Ai ipasirsir do haluahonku
marhitei Jesus Anak-Ni in.
2. Tarsangkut ahu ibahen dousa ,
hape idingat Tuhanku au.
Ai do ‘se ningku tong:
Holong do atei ni Naibatangku mangidah au.
3. Tibal do ahu bai hamateian,
hape itatap Tuhanku au,
Ai do ‘se ningku tong:
Holong do atei ni Naibatangku mangidah au.