1 Nopember: Domma ipakei hita pakean pesta ai?

 

“Jadi ihatahon ma dompaksi: sonaha do parmasukmu hujon bapa, ai seng marpahean pesta ham?” (Mateus 22: 12)

Domma ibere Naibata banta pahean pesta, humbani etek-etekon nari do ai ibere. Ijalo hita do hasasapan ni dousa bani pandidion na pansing in. Itompa ma goluh na baru pakon haporsayaon banta, ibagas uhurta. Ijalo ma hita gabe pagori bani harajaon nagoriatas, jadi gabe Kristen na dear ma hita. Dob ai tubuh ma hita paduahalihon janah gabe anak ni Naibata.

Domma girah ai ibahen Naibata banta. Napuji ma goranni na pansing ai. Sonaha do pardomuanta pakon Naibata? Domma ipakei hita pakean pesta ai, ai ma hapintoron ni Kristus? Domma sirsir hita mammasuki labah ni surga? Porini idilo hita bani ari paruhuman na banggal ai, ulang ma iluarhon Naibata banta: “Sonaha do parmasukmu hujon bapa, ai seng marpahean pesta ham?” Ulang das ihatahon banta: “Sangkut ma naheini pakon tanganni, timpalbon ma hu darat. bani na golap marimpot-impot, ijai ma masa partangison pakon na patungosngoson?

Anggo sihol pakeonta do hapintoronta sandiri seng boi hita masuk hu pesta na i nagoriatas ai. Pahean pesta ai hapintoron na niombouhon ni Jesus Kristus do hansa. Sonaha do na dob mamahei pahean pesta ai? Ai ma na manggoluh rapkon Naibata, ibagas haporsayaon bani Jesus Kristus. Na dob sasap do dousani ari-ari marhitei pangkopkopon ni Jesus Kristus bani hayu parsilang ai. Ari-ari do ai mantaluhon dousa pakon parlajaoan marhitei hagogohon na humbani Naibata janah na mandalankon harosuh ni Naibata.

Domma dihut ham na mamahei pahean pesta ai? Anggo lape maruntol ma ham ase dihut ham mamahei pahean pesta ai. Ulang haru uhurmu atap lape dong haporsayaonmu bani pangkopkopon ni Tuhan Jesus. Naibata do sibere haporsayaon. Pindo hani bani Naibata ase ibere bamu haporsayaon ai, mangkaporsayai Tuhan Jesus Kristus Sipaluah in.

Tarima kasih ma Bamu Naibata, halani ijalo ham do pardousa, na roh hu Bamu marhitei Tuhan Jesus Kristus na mambahen hapintoronnami. Amen.

Haleluya No. 130: 4, 5: Ai Domma Jumpah Au Ondolan

4. Domma mogap ganup dousanta bai darohni Tuhanta in.
Ai anggo porsaya do hita seng bulih hona uhum in.
Ibaen hata ni daroh in na mangkahui jolma in.
5. Halani ai unobkonon ma dousangku bai paridian in.
Hupasasapkon ma dousangku bai Jesus Sipagoluh in.
Anggo manolsol diri au bai Jesuskin tongtong au lao.

2 Nopember: Martuah ma na matei ibagas Tuhan in >>

<< 31 Oktober: Salah ni Naibata do?