19 Nopember: Manasap Salah ni Hasoman

 

Anggo mardousa saninamu, parayak anjaha ajari ma ia, hanima padua-dua. Anggo itangihon ho, gabe hasomanmu ma ia use“. (Mateus 18: 15)

Anggo dong hasoman mambahen na so dear dompak ham, seng dear ai patugahonmu bani hasoman na legan, seng dear bastu na legan mansahapkon ai. Ham ma laho mansahapkon bani dumpar, padua-dua, ai ma na martuktodung ai, seng dong na legan mambogei, ijai ma ia paingat ham ibagas holong seng dear na legan bastu pasal ai.

Anggo hita surdung do hita dompak suhar-suhar na hinatahon ni Tuhan Jesus ai banta. Seng laho hita hubani sanina na marsalah ai, ase hita marsahap padua-dua. Hubani na legan do hita patugahkon salahni atap dousani. Jadi dob ibotoh ai, seng lambin dohor ia bani Tuhanta, tapi lambin daoh do, lambin ganggang do, lambin sogam uhurni banta.

Tapi hata ni Tuhanta torang do, hubani parsalah ai do hita laho patugahkon salahni mangajari, ase mulak dear use. Anggo muntul ijai boi ope bani gamot ni Kuria. Domma homa iparbagah Tuhanta: Anggo tumpu dua atap tolu halak marhiteihon goranni, itongah-tongah ni sidea do Ia.

Anggo idalankon hita hata ni Tuhanta on, banggal do pasu-pasuni itongah-tongahta. asal ijalo hita ibagas toruh ni uhur. Manasap salah ni parsalah, ai ma sada arihan ni parsaoranta ibahen Tuhanta sipakeonta i dunia on. Marhitei holong do ai dalanonkon. Sonangni ai tene anggo mardomu na marsihaholongan? Na marsanina do hita haganup jolma manisia, tarlobih sagala na dob tardidi hubagas goran ni Naibata Sitolusada ai. Pingkir ham lobei tongkin hata ai. Dong ma sadiha bolag nuan ihamkam uhurmu na dob saninamu. Ra otik ope tene. Maruntol ma hita marhitei gogoh na humbani Tuhanta ase lambin bolag ilangab parsaninaon ai banta.

Ham Tuhan Naibata! Tonggor Ham ma ahu ibagas idop niuhurMu. Urupi Ham ma hanami mandalankon Titah haholongon ai, ronsi manasap salah ni na marsalah dompak hanami. Amen.

Haleluya No. 130: 1, 3, 4: Ai Domma Jumpah Au Ondolan

20 Nopember: Mase lang ra hita marholong ni uhur bani hasomanta? >>

<< 18 Nopember: “Anggo mardousa saninamu”

Advertisements