21 Nopember: Mansopotkon dosa

 

 

Barang ise na manrongkob hasalahanni, seng anjai margatuh, tapi na mansopotkon salahni anjaha manadingkon, dapotan idop ni uhur do. (Podah 28 : 13)

(Terj LAI 1976: “Barang ise na manrongkob panlanggaronni seng martuah ai, tapi halak na mansopotkon salahni anjaha itadingkon ai, dapotan idop ni uhur do).

Sanggah danak diri nadingat do dua parlahou dompak urangtua: Sada anggo marsalah diri mintor napatugah hasalahan ai. lgilai do tongon diri ase ulang sonai sahali marhitei ladung. Gabe seng sonang uhurta, atap ibotoh do holi salahkai? Seng martuah, seng margatuh sisonai ai, seng sonang.

Sagala hasalahan na hinasipkon, sai marsahap do use ia dompak diri ai tong do mulgap sadokah nape sasap. Tapi na mansopotkon salahni anjaha manadingkon salah ai, manundalhon horja na lepak ai. dapotan idop ni uhur ma, dapotan hasasapan ma. Jadi maluah ma uhurni humbani hasalahan ai.

Raja Daud mangkatahon: Sadokah huhasipkon dousangku, reong do holiholingku. Martuah do jolma na dob sinasap panlanggaronni, na dob irungkub dousani, martuah ma jolma anggo lang ihira Jahowa dousani bani.

Tapi mansopotkon salah ma sada horja na borat, tapi ai ma sada horja na mulia. Ai mansopotkon salah pakon dousa, dua do nidokni ai: Sada, lepak ma ai hubahen sonai, sada nari jora ma ahu mambahen sonai.

Ase ningon putus do uhur manadingkon salah atap dousa ai. Dob sonai pe ase roh hita hubani Naibata marjora-jora, mangindo ampun, mangindo hasasapan ni dousa. Bereonni do ai banta halani Tuhan Jesus Kristus na dob matei mangkopkop hita.

Porlu idahonta, gijang ni uhur do sada mangambat hita mansopotkon salah bani hasoman jolma. Mintor marditoruh ahu hape? Patoruh hita ma uhurta. Tarlobih ilobei ni Naibata, mase lang ra ham mansopotkon dousamu? Sonaha pe pamonopmu ididah do dousamu ai, ibotoh do torang.

 

Tarima kasih ma Bamu. Ham Bapanami na i Nagori atas, halani lumbang ni uhurMu pakon idop ni uhurMu manasap dousanami pakon manjalo hanami mulak gabe niombahMu. Amen.

Haleluya No. 148 : 2, 3: Layak do Ham Mambere Au

2. Pardousa na banggal do au, pansing do anggo Ham ;
Sai bai na dorsa laho au bai na jahat naman .
3. O Tuhan, husopotkon ma ganupan dousangkin ;
Holong ma Ham, sai sasap ma, Bamu ma tonduyhin.