25 Nopember: “Sirang humbani hajahaton”

 

tnt_nov24_daohdosahajahaton

 

Barang ise na mandilo goran ni Tuhan in, maningon sirang ma ia humbani hajahaton. (2 Timoteus 2: 19c)

In ma anggaran dasar ni na masuk hu harajaon ni Naibata. Ase masuk ia anggota (pagori) ni Harajaon ni Naibata, ipadaoh na dirini humbani hajahaton. Lang malo be ia songon pargoluhon sapari mansuhuni hisap-hisap ni angkulani, tapi maningon manggoluh ia ibagas hapansingon romban hubani na pansing ai Naibata.

Sonari domma tongtong hita mardilo goran ni Naibata, goran ni Tuhan Jesus, tapi seng ipadaoh hita dirinta humbani hajahaton. Aturan ai ijalo hita do sanggah tardidi hita ampa sanggah manaksihon haporsajaon. Bani panorang ai marpadan do hita mambalosi Naibata ampa manundali sibolis pakon sagala horjani.

Ra manungkun uhurmu use: sabotulni boi do hita mandalankon ai?

Boi do marhasoman janah mangunsagahkon holong ni atei ni Naibata: Anggo isuruh Naibata Tonduyni hu banta ase boi hita mansuhuni padanta sanggah tardidi ondi atap sanggah manaksihon haporsajaon ondi, boi manggoluh hita ibagas haporsajaon.

Sonaha romban do goluhmu bani padan mula-mula ai? Mardomu do uhurmu pakon pingkiranmu hujai, hatamu pakon parlohoumu? Sonaha do pardomuanmu pakon Tuhan na nidilomu pakon na mardilo ham, lambin ganda do ham ibagas idop ni uhur ni Naibata? Atap tongtong hansa atap surut? Tongon do sagala na mardilo Tuhan ipadaoh do dir ini humbani hajahaton? Mardilo goran ni Tuhan do hita tong ibagas tonggonta ampa dodingta, dear ma ai. Tapi surut do hita humbani hajahaton, humbani dousa?

Sai sipartonggo ma hita! Sipartonggo, artini gati martonggo, sedo saholi sahali hansa. Pardomuanta pakon Naibata do gogoh banta surut humbani dousa pakon hajahaton. Anggo gati hita pajumpah pakon Naibata, gati hita marsahapi pakon Naibata, lambin magigi do hita bani hajahaton.
Ham Tuhan Naibata! Anggo huparanggak ma pargoluhonku ilobeiMu, maila do ahu. Urupi Ham ma ahu, ase sirang botul ahu humbani dousa pakon sagala hajahaton. Amen.

Haleluya No. 108 :1, 6, 11. 12: 108. Sanggah Holong Tong Tuhanta >>

Advertisements