27 Nopember: Uhur ni na mambere ai do itorih Naibata

 

 

Ai humbani lobih-lobihni do idabuhkon sidea bei; tapi anggo naboru an, ibagas hahuranganni idabuhkon do haganup na dong bani, haganup hagoluhanni. (Markus 12: 44)

Sonai do Titah ni Naibata bani Padan na Basaia, ningon mambere do, ai ma pambalosion bani Naibata. Sibagi sapuluh ni sinarini maningon bereonni bani Naibata.

Titah parsapuluhan ai seng manrajai hita be bani Padan na Baru. Hita na mangihutkon Kristus, lang be das banta Titah-titah ni Jahudi. Ibere hita do galanganta bani Naibata, galangan bulan, galangan tahun, bani na masombuh, na mapitung, na gadamon pakon na legan pe. Tapi bani Padan na Basaia, ningon igoki do leter ni Titah ai.

Na mabalu na tarsingat bani ajat na iatas on, sipambere hinan do ia janah ibotoh ia Naibata sidingdingi halak na mabalu do janah bapa ni na tading maetek (na girah lang maramang-marinang). Ibere do dua rimis ai ma sada sen. Ibotoh do Naibata na boi mansarihonsi, ibotoh do holong ni uhur ni Naibata bani, ai do na manjuljulsi laho hu rumah panumbahan mamberehon sagala na dong bani.

Mambere bani harajaon ni Naibata pambere ai do itorih, tapi Naibata, na tading ai ampa uhur ni na mambere ai do itorih. Dob isurdukkon pambereni ai, sadiha nari tading bani?

Deba na marnah-na-dong banggal do pambereni tapi panrunting-runtingan ni parhiraanni do iberehon. Na mabalu on dob iberehon pambereni ai seng be dong tading bani.

Na mabalu do ibahen siusihan ijon. Na mabalu siurupan do ai namin, sitolongan, sikawahonkon ni halak Kristen ai, hape ai do ijon gabe usihan.

Maila hita na sirsiran on mardingat pamberenta hubani harajaon ni Naibata. Hurang ope marimbang domma deba matoras ibagas harajaon ni Naibata, matoras ibagas ugama.

Sadiha ibere ham galangan Minggumu siap Minggu? Gendo namin sada tolur dayok, ia lang pe gendo sada goreng pisang atap na saharga ni ai, atene? Deba songon na haru hinan hu rumah, ia sadiha pe galangonkonmu ninuhurmu. Anggo boi tonggohon ham ope ai dearan: On ma galanganku arian on Tuhan.

 

Ham Tuhan Naibata ni holong! Suan Ham ma bangku holongMu, ase holong uhurhu janah banggal uhurhu laho manggalang Bamu. Amen.

Haleluya No. 5 : 1.4: Hupuji Holong ni Atei-Mu >>

1. Hupuji holong ni atei-Mu, o Tuhan Jesus Rajangkin
Bamu huondoskon tonduyhu, ai do napinindo Mu in
Huhalupahon ma diringku mamingkir holong ni atei-Mu,
4. Bamu sadokah ni dokahni, au on o Jesus Tuhankin,
Ham ma lah haganup ompungni, gogohku pakon artangkin,
Ai iberehon Ham darohMu, manggalar utang ni dousangku.