30 November: Anggo Ihartuki Tuhan Uhurta

tnt_nov30_wahyu3_20

 

Tonggor ma, na jongjong do Au ilobei ni labah in manghartuki (Pangungkabon 3: 20a)

Domma naik Tuhan Jesus hu Nagoriatas. hundul Ia isiamun ni Naibata, Bapanta. Domma ondos hu Bani sagala kuasa na i Nagoriatas pakon na i tanoh on.

Age pe sonai seng lupa Ia bani hagalekonta, na gok dousa ope. Idingat do hita marhitei holong-Ni na bagas tumang, na sihol mangurupi hita ase maluah hita humbani dousa, ai ma ase roh Ia marhitei hatani mangkartuki labah ni uhurta, ase ibuha hita janah mambere ianan ase marianan la ibagas uhurta.

Gati do ipagolpa hata ni Naibata hita, ase mubah uhurta janah porsaya bani Naibata. Jesus sandiri do mangkartuki labah ni uhurta marhitei hata-Ni pakon Tonduy na Pansing, laho mangurupi hita.

Ongga do iahap ham ihartuki Tuhan Jesus labah ni uhurmu? Ra do song iahap ham. Tuhan Jesus sandiri do ijai mangkartuki anggo ibogei ham hata ni Naibata i gareja atap i partonggoan gabe songon na hona iahap ham. Ijai ulang ipatendel ham uhurmu pasal dousa ai pakon hamubahon ni uhur ai. Ulang ipintu ham uhurmu dompak Tuhan Jesus, ai na laho urupanni do ham.

Ra iparhatongon ham do on: Tongon gati do hubogei hata ni Naibata i gareja atap i partonggoan, tapi hupatendel do uhurhu, nimu. Atari ihatahon uhurmu: Atap seng ra Tuhan Jesus mangurupi ahu?

Porsaya ma ham ra do Tuhanta mangurupi ham. Tonggor ma, age bani panorang on roh do gati Tuhanta mangkartuki uhurta. Buhai ham ma uhurmu. Parimbagaskon ham ma hata-Ni.

Sedo pitah sanggah mambogei hatani ihartuki Tuhanta uhurta, tapi age marhitei sitaronon atap pusok ni uhur, sonai age marhitei malas ni uhur, ra do Tuhanta mangkartuki labah ni uhurta. Tangihon ham pangkartukni ai, buha ham uhurmu Bani.

 

Ham Tuhan Jesus! Gati do sihol marsahap Ham hubagas uhurhu, tapi manendel do uhurhu. Sasap Ham ma dousangku pasal ai. Urupi Ham ma ahu manangihon pangkartuk-Mu pakon mambuhai uhurhu bahen iananMu. Amen.

Haleluya No. 18 : 1.2: HataMu, ale Tuhanku >>

 1 Desember: Na porlu banta mambuha uhurta do >>

<< 29 Nopember: Roh Ia ase Ia raja ni uhurta