16 Oktober: “Dompak Ham ….sandiri do ahu mardousa”

tnt_okt16_salahnihasoman

 

“Dompak Ham, hu Bamu sandiri do ahu mardousa, na jahat ididah panonggor-Mu do huhorjahon”. (Psalm 51: 6)

Bagei do salahta ampa dousanta dompak hasomanta jolma. Tapi sagala dousa ai panlanggaron do ai bani Titah ni Naibata. Songon Raja Daud na marsuruh mamunuh si Urias janah mambanihon Nai Batseba jolma ni si Urias dompak jolma do ia mardousa (mamunuh, marbangkis). Tapi iahap uhurni, dompak Naibata sandiri do ia mardousa. “Dompak Ham, hu Bamu sandiri do ahu mardousa”, “na jahat ididah panonggor-Mu do huhorjahon”.

Ayat na iatas in ma sabagian tonggo ni Raja Daud dob mardousa ia. Tongon do sagala salahta dompak hasoman jolma dousanta do ai dompak Naibata. Ase parlobei sopotonkonta ma dousanta hubani Naibata jojor ma patugah hita aha-aha deba dousanta, lepakta, pakon salahta ampa panlanggaronta. Pindoonta ma hasasapan ni dousa ibagas na marjora-jora. Tenger ma uhurta maidop do uhur ni Naibata mangidah hita, halani Tuhan Jesus Kristus ra do Ia manasap dousanta janah ra do Ia manjalo hita mulak gabe anakni.

Tarbahen Naibata do ai halani na dob manaron na marsik janah matei Tuhan Jesus mangkopkop hita jinuljul ni holong ni uhurni. Na porlu tumang banta mananda dousanta do, janah on do sada na mahol bani hita pardousa on.

Mananda dousa ni hasoman, salahni atap pe hahuranganni, urah do hita. Pingkiran riap, sai hita do na pintor, hita do na sintong, tapi hasoman do na marsalah, hasoman do na lepak. Halani ai pindoonta do bani Tuhanta, ase isuruh Tonduy-ni hu banta patandahon, manuduh dousanta ai.

Jagaonta ma ase ulang hita mangapiti diri, anggo roh husip ni Tonduy na Pansing ai manuduh dousanta. Hita do hansa na boi tangkas namin mananda dirinta; tapi anggo iapiti hita dirinta, gabe lang be sintong panandaonta ai bani dirinta.

Halani ai Tonduy ni Naibata do hansa sintong panandaonni bani dirinta, ai ma ase Tonduy do parsintaonta manggorani dousanta banta.

 

Ham Tuhan Naibata, suruh Ham ma Tonduymu hubagas uhumami, manrigapi sagala dousanami, ase ipatidak age ididah hanami buei pakon banggal ni dousanami bani hasoman na ponop, ase ulang hanami boi mangapiti diri. Tapi ase ididah hanami buei pakon banggal ni dousanami bani hasoman, tarlobih hulobeimu. Amen.

 

Haleluya No. 148: 2,3,5: Layak do Ham Mambere Au >>

17 Oktober: Aha na patut horjahonanta ari Minggu? >>

<< 15 Oktober: Ulang Parsangsian bani Dakdanak

tnt161016

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s