1 Oktober: Ganup do manumpak bani ni madear bani na marholong ni atei bani Naibata

tnt_okt1_manumpak bani na na madear.jpg

 

Ai ibotoh hita do age aha pe manumpak hubani na madear do bani sagala na marholong ni atei bani Naibata, ai ma na dob idilo mangihutkon sura-surani. Sonaha ma ninta pasal ai? Anggo Naibata hasomanta, ise nari imbangta? Seng ilioi Anakni sandiri tapi iondoskon halani hita, tor lang iberehon rap pakonsi age aha pe hu banta?” (Roma 8: 28, 31, 32)

 

Sagala na masa atap na dong, ganup do manumpak bani ni madear bani na marholong ni atei bani Naibata, bani na porsaya: Naborit, pusok ni uhur, parlajoan ampa sitaronon, goluh hajorgiton, liah, sangap, ganup do ai manumpak bani na madear bani na marholong ni atei bani Naibata.

Halani holong ni Naibata na rati pakon holongta dompak Naibata, aha pe lang harusakta, mangidah aha pe seng hita bobor. “Anggo Naibata hasomanta ise nari imbangta?” Domma ibere banta sibere-bere tang na banggal, ai ma Anakni na marsitaronon janah matei halani hita, ai lang bereonni ma banta na legan ai? Bereonni ma banta gogoh mangimbang parlajoan ampa mangimbang hajahaton. Bereonni do banta malas ni uhur age i tanoh on ambah ni malas ni uhur magira ai. Sagala nadageita i tanoh on, manumpak ma ai bani pasu-pasu hu hanta. Bani masa ni hasunsahan, hatahon ham ma ibagas uhurmu: “Domma ibere Anakni ai bangku matei bani hayu parsilang, tontu bereonni do bangku sagala na porlu mangihutkon panorang ni Naibata.

Ai tongon do holong uhurmu bani Naibata? Holongan do uhurmu bani Naibata ase bani sagala na dong?

Pindoonta ma bani Naibata, ase isuan janah ipabanggal holong ni uhurta Bani. Holongmu bani Naibata do panguntuni ase manumpak bani na madear sagala na masa bamu. Jadi honan ma hita bani bagah-bagah ni Naibata na ibagas ayat na iatas in.

Tarima kasih ma Bamu Naibata, ibahen Ham do manumpak bani na madear sagala na masa bannami, pusok ni uhur atap malas ni uhur pe. Tambahi Ham ma holong ni uhurnami hu Bamu. Amen.

 

Haleluya No. 152: 2, 3:

<< 30 September: Ra do Martorap Ham Mardalan Bani na Golap