Oktober 14: Mangkaholongi Dakdanak

 

“Na manjalo dakdanak na sonon halani Goranku, Ahu do na jinaloni ijai”. (Mat. 18 : 5)

Aha ma na tarbahen ahu dompak Tuhanku? Ai ma sungkun-sungkun ni na marbanggal ni uhur halani holong ni uhur ni Tuhan Jesus na banggal in na dob mangkopkopsi halani holongni. Ayat na iatas in ma balos ni ai: “Na manjalo dakdanak na sonon halani goranku, Ahu do jinaloni ijai”.

Gati do lupa hita bani hata on sanggah marsaor hita pakon dakdanak. Porini pajumpah Tuhan Jesus pakon dakdanak on, sonaha nani hata-Ni, sonaha nani ibahen? Sonai ma namin bahenonta. Holong do uhurta bani dakdanak songon parholong ni Tuhan Jesus?

Na manjalo dakdanak ai ibagas goran Jesus, huankuan ni Tuhan Jesus ma ai. Ipasu-pasu Tuhan Jesus do sagala na mangkaholongi dakdanak. Lambin iajari do hita marholong maniru Tuhan Jesus.

Buei do dakdanak na tading maetek na iarsik-arsik inang-duani, sonai dakdanak na so dong be na mansarihonsi. Sisonai ma deba na nidingat ni Tuhan Jesus, sipatorsaonni. Ai do ase dong ibahen Kuria ni Kristus partumpuan ni na tading maetek, mardingat hata ni Tuhanta: “Na manjalo dakdanak na sonon halani goranku, Ahu do na jinaloni ijai!”.

Sedo pitah pardagingon ni dakdanak porlu sarionkonta, siporluan ope partonduyon ni dakdanak ai. Porlu tumang hata on iparimbagaskon pangajari (guru-guru) Sikolah Minggu.

Holong ni uhur ni Tuhan Jesus dompak dakdanak, sihol ma ai dalit bani na manjalo holong ni Tuhan Jesus. Age pe ihatahon Tuhan Jesus na binahen bani dakdanak ai ihira Tuhanta na hu Bani do ai, tapi ulang ham lepak, ulang gabe idoumu ai bani Tuhanta mangombou hagoluhan magira, ulang iahap ham jasamu ma ai bani Tuhan Jesus. Anggo Tuhanta mangkatahon sonai Ia ma ai, tapi ulang uhurmu mangkira ai. Idalankon hita pe ai sedo ai parombouta sedo ai jasanta.

 

Ham Tuhan Jesus! Urupi Ham janah ajari Ham ma hanami mangkaholongi dakdanak songon na binahenmu, tanda ni banggal ni uhurnami bani holong ni uhur-Mu bannami. Amen.

Haleluya No. 192: 1, 4, 5: Haholongi Siparmahan >>

15 Oktober: Ulang Parsangsian bani Dakdanak >>

<< 13 Oktober: Anggo Masa Sitaronon

 

tnt161014

 

Advertisements