27 September: “Sada do hansa na porlu”

tnt_sep27_songonsimaria

 

“Jadi nini Tuhan Jesus ma mambalosi Marta! Marta! Buei do isarihon anjaha ihasunsahon ho, sada do hansa na porlu: ipilih si Maria do rupei sidearan, seng sibuaton be ai humbani”. (Lukas 10: 41, 42)

Roh do Tuhan Jesus gabe tamuei i rumah ni si Marta pakon si Maria i Betania. Halani ai hosei do si Marta, mangkoseihon na porlu bani Tuhan Jesus ase sonang la, ibahen ma sibar na tarbahensi. Holong do uhur ni sidea bani Tuhan Jesus, si Maria anggini pakon si Lasarus botou ni sidea.

Bani panorang ai ma dapotan sipaigat si Marta humbani Tuhan Jesus: “Marta! Marta! Buei do isarihon anjaha ihasunsahkon ho, sada do hansa na porlu: ipilih si Maria do rupei sidearan, seng sibuaton be ai humbani”.

Aha na so idingat si Marta ibagas holongni uhurni bani Tuhan Jesus? Marlajar ma hita bani hata ni Tuhan Jesus pasal si Maria ai. Ai ipilih si Maria gan rupei sidearan. Aha ibahen si Maria dob roh Tuhan Jesus? Hundul si Maria ilambung nahei ni Tuhan Jesus manangi-nangi hata-Ni, mambogei podah-Ni. Si Marta seng sompat hundul ilambung ni Tuhan Jesus halani buei ihoseihon laho pasonangkon uhur ni Tuhan Jesus tamueini ai. Ai rupei sidearan, ai ma mambogei hata ni Naibata ampa marimbagasni.

Harga do banta hata sipaingat na bani si Marta on, ai hita pe buei do mangkirahon pakon mangkasunsahkon na marbagei-bagei in, pala seng sompat hita mambogei hata Naibata. Hosei hita mansarihon niombahta, mansarihon parinangonta, mansarihon paramangonta bani horjanta ari-ari. Ari-ari do panorangta igoki na mansarihon, na mangkoseihon na porlu bani goluh on. Gabe lang be dong sompat panorangta dompak ugama, dompak kuria, dompak horja mission (zending) ampa horja riap sosial. Lang dong be panorangta hundul ilambung nahei ni Tuhan Jesus mambogei Hatani ase ibere banta pasu-pasuni marhitei hata ai.

Sai pasiat hita ma hata sipaingat ai. Tarhonahon hita ma tong mambuat na porlu ai, arta sidearan ai ilobei ni Tuhanta.

Porlu do hita mangurupi horja ibagas kuria ni Tuhanta, tapi daoh porluan anggo hita bosur itamuei Tuhanta marhitei Hatani.

 

Tarima kasih ma bamu Tuhan Jesus! Urupi Ham ma hanami, ia sonaha pe hentusnami mansarihon na porlu bani goluh na mangilei on, sai bahen Ham ma ase sai tarhona, hanami roh manangihon hata-Mu. Amen.

Haleluya No.18 : 1, 2: HataMu, ale Tuhanku >>
1. Hata-Mu ale Tuhanku, arta siharganan ai
Sai palongkot bai uhurhu, ulang lang hujolom ai
Anggo seng be sijoloman Hata na madear ai
aha ma na baen onjolanni haporsayaonkin
2. Ale Jesus sai kawahkon, sai parorot Ham au on
‘Se totap haporsayaon mangiankon uhurhon
Sai paringgas Ham uhurhu, manangihon Hata ai
Sai horahan bai podah-Mu, songon si Maria ai

28 September: Marmalas ni Uhur Tongtong (1) >>

<< 26 September: “Seng ra Naibata apasan”

tnt1690927

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s