28 Januari: “Ulang ma nasiam mambalas”

tnt_jan28_ulangibaloskon

 

Nasiam, na hinaholongan, ulang ma nasiam mambalas, tapi padas nasiam ma ringis in bani Naibata, ai tarsurat do: Bangku do pambalason, Ahu pe mambalaskon, nini Tuhan in. (Roma 12: 19)

Hita halak Kristen seng pala, seng patut tene maruhur pambalosan porini pe dong na mambahen na hurang hu banta. Seng itanganta pambalosan, itangan ni Naibata do. Patut do hatahononkon ni uhurta: “Seng ra ahu mambalas, pasal ai (atap aha pe) Tuhan ma mambotoh ai”.

Hita halak Kristen patut do ingatonta Tuhanta na so ra mambalas ai. Anggo idingat hita gelah hatani bani hayu parsilang: “Ham Bapa! Sasap Ham ma salah ni sidea, ai seng ibotoh sidea na binahenni” (Luk, 23 : 34). Ipindo bani Bapani ase ulang ibalaskon pambahenan ni Jahudi dompak diri ni Jesus.

Tongon borat do ai bani hita pardousa on. Sasapon hape salah ni munsuh? Songon na so tarpasiat hubagas uhur halani hagalekonta. Tapi anggo tongon-tongon do ham masihol bani idop ni uhur ni Naibata, anjaha iahap ham ijalo ham idop ni uhur-Ni ai, dalit do bamu uhur na maidop ai.

Anggo iahap ham songon na milas janah gara uhurmu dompak hasoman, soh ma ham lobei, marpingkir ma ham pasal dirimu, atap aha deba na jahat isi ni uhurmu. Podas ma ham laho hubani Naibata patugahkon ai janah mangindo idop ni uhur-Ni bamu. Dob ai lambin maridop ni uhur ma hita mangidah hasoman, lambin daoh ma uhur pambalason.

Ngalut do mandalankon ai, tapi roh ma ham bani Tuhan Jesus mangindo sabar ni uhur. Bereonni do ham. Porsaya ma ham!

 

Ham Tuhan Naibata, mardousa do hanami dompak Ham, tapi maridop ni uhur do ham janah marontou ni uhur dompak hanami. Urupi Ham ma hanami ase maidop uhurnami mangidah hasomannami jolma. Amen.

Haleluya No. 153 : 5, 6: Ondoskon Haganupan >>
5. Paturut Naibantanta patorsa langkahmin ;
Na pandei do Tuhanta, ganup pasirsir in.
‘Tor sungkod pingkiran-Ni lao paluahkon ho ?
Gogoh-Ni ituduhkon, ase ididah ho.
6. Ai pe, 0 Tuhannami, taluhon hajojor
Pusok ni uhurnami sagala na sambor
Hu surga in sai bolas ma tonduynami rup
Hu tangan-Mu ma ondos hanami on ganup .

Advertisements